Аб стварэнні шырокага грамадзянскага руху "За свабоду" было аб'яўлена 25 сакавіка на Кастрычніцкай плошчы Мінска.

Аб гэтым сказаў лідар аб'яднаных дэмакратычных сіл Аляксандр Мілінкевіч.

- За пяць месяцаў нашай інфармацыйнай і агітацыйнай кампаніі да нас звярнулася з прапановамі аб супрацоўніцтве велізарная колькасць людзей, якая ў дзесяткі разоў вышэй за колькасць сябраў палітычных партый і грамадскіх арганізацый. Улада нахабна ўкрала ў нас перамогу, таму за яе яшчэ трэба змагацца. Нас чакае карпатлівая сістэмная праца, якая непазбежна прывядзе да дэмакратычных змен у Беларусі, - сказаў Аляксандр Мілінкевіч.

У суботу, 25 сакавіка, на Кастрычніцкай плошчы былі агучаныя асноўныя палажэнні праграмы Руху "За свабоду". Сярод іх - магчымасць для рэпрэсаваных студэнтаў прадоўжыць навучанне за мяжой, стварэнне ўсёабдымнай надзейнай сістэмы распаўсюджвання праўдзівай інфармацыі, ажыццяўленне дзеянняў, якія дазволяць правесці ў краіне свабодныя і празрыстыя выбары.