У траўні 2010 года Рух «За Свабоду» распачаў кампанію «Народная праграма» — шырокі працэс выпрацоўкі канцэпцый рэформаў у Беларусі праз экспертнае і грамадскае абмеркаванне найважнейшых пытанняў развіцця краіны.

Мэта кампаніі

«Народная праграма» мела на мэце стварыць аснову для дэмакратычных пераменаў, аб’яднаўшы як прафесійны досвед экспертаў, так і меркаванні грамадзянаў. У цэнтры ўвагі былі пытанні эканомікі, адукацыі, аховы здароўя, дзяржаўнага кіравання, культуры і іншых сфер жыцця.

Адкрытасць і выкарыстанне

Наработкі «Народнай праграмы» ад пачатку былі адкрыты для выкарыстання ўсімі палітычнымі і грамадскімі сіламі, зацікаўленымі ў будучыні Беларусі. Гэта зрабіла ініцыятыву важнай інтэлектуальнай і арганізацыйнай пляцоўкай для ўсіх, хто бачыць Беларусь вольнай і дэмакратычнай.

«Гэта пазітыўная альтэрнатыва для нашай Беларусі. Яна тлумачыць людзям, што будзе ў розных сферах, калі настануць перамены: як зменіцца жыццё, што будзе з эканомікай», — адзначаў лідар Руху «За Свабоду» Аляксандр Мілінкевіч.